मोरङ । नेपाल–भारत सीमाना जोगबनी नाकाबाट आयात–निर्यात ठप्प भएको छ । भारततर्फको मीरगञ्ज खोलाको पुल मर्मतसम्भारको काम थालिएपछि आयात–निर्यात ठप्प भएको हो ।
करिब तीन वर्षअघि २०७४ सालको बाढीले पुल क्षतिग्रस्त भएको थियो । त्यसबेला पुल सञ्चालनमा आउन एक वर्ष लागेको थियो । उक्त कमजोर अवस्थामा रहेको पुलको पुनः मर्मतको काम थालिँदा आयात–निर्यात बन्द भएको हो । बाढीले क्षति र्पुयाएको पुल निर्माण पछि ४० टनभन्दा बढी भारका मालवाहक सवारी बन्द गरिएको थियो ।
मर्मत भइरहेको पुलमा एकतर्फी मात्र सवारी चल्न दिएको छ । एकतर्फी आवागमनमा हल्का सवारी साधन मात्र चल्न पाउँछन् । डिसेम्बर १९ बाट पुलको मर्मत सुरु भएको विराटनगर भन्सार कार्यालयका सूचना अधिकारी मणिराम पौडेलले जानकारी दिए । उनले पुलको मर्मत डिसेम्बर ३० मा सम्पन्न हुने जानकारी आएको बताए ।
‘पुलको मर्मत सुरु भएपछि भन्सारको कारोवार ‘ह्वात्तै’ घटेको छ,’ उनले भने, ‘दैनिक १४र१५ करोड राजस्व संकलन हुन्थ्यो । अहिले पाँच लाखसम्म हुनेगरेको छ ।’ विराटनगर भन्सारबाट दैनिक २ सय देखि २ सय ५० मालवाहक ट्रक नेपाल प्रवेश गर्ने गरेका थिए । भारत जोगबनी नजिकको मीरगञ्ज पुल मर्मत सुरु भएपछि नेपाल आउने प्रतीक्षामा रहेका गाडीको लाईन लामो रहेको छ । पुलपारि सयौँ गाडी लाइन लागेर बसेका छन् ।
