धनकुटा । धनकुटाको चौबिसे गाउँपालिकाले एक सय ६ जनालाई अपांगता परिचयपत्र वितरण गरेको छ । २८औँ अन्तर्रा्ष्ट्रिय अपांगता दिवसको अवसर पारेर गाउँपालिकाले विभिन्न किसिमका अपांगता परिचयपत्र वितरण गरेको हो ।
गाउँपालिकाभरका अपांगता भएकाहरूको अपांगताको प्रकार परीक्षण गरी उनीहरूलाई परिचयपत्र वितरण गरिएको थियो । पूर्ण अशक्त २१ जनालाई रातो, अतिअशक्त ३२ जनालाई नीलो, अशक्त ३२ जनालाई पहेँलो र साधारण अशक्त २१ जनालाई सेतो कार्ड वितरण गरिएको चौबिसे गाउँपालिका महिला शाखाकी गीता लिम्बूले जानकारी दिइन् ।
गाउँपालिकाले अपांगता दिवसको सन्दर्भ पारेर स्वास्थ्य शिविरसमेत सञ्चालन गरेको थियो । शिविरमा धनकुटा अस्पतालका मेडिकल अधिकृत डा. पूजन विश्वकर्माले स्वास्थ्य परीक्षण गरेका थिए । त्यस्तै, अपांगता दिवसको अवसरमा छथर जोरपाटी गाउँपालिकाले अपांगता भएकालाई जीवनसाथी रोज्ने उदाहरणीय तीन जोडीलाई सम्मान गरेको छ । गाउँपालिकाका अध्यक्ष शेरबहादुर लिम्बूले उनीहरूलाई सम्मानपत्रसहित दोसल्ला ओढाएर सम्मान गरेका थिए ।
