ढुंगाले लागेर मोटरसाइकलमा सवार प्रहरी इञ्चार्जको मृत्यु

इलाम । इलाम नगरपालिका–२ मा भएको दुर्घटनामा एक प्रहरीको ज्यान गएको छ। अपराहन्न २ बजेको समयमा बिब्ल्याँटेबाट सुम्बेक जाने क्रममा छाँगे खोलामा मोटरसाइकल दुर्घटनामा परेर अस्थायी प्रहरी पोष्ट बिब्ल्याटेका इन्चार्ज रवीकुमार मगरको निधन भएको हो। सुम्बेकमा झगडा भएको भनी सूचना आएपछि बा २ ब २२८८ नम्बरको मोटरसाइकल चढेर घटनास्थलतर्फ हिँडेका थिए। सो क्रममा बाटो माथिबाट आएको ढुंगा लागेर उनको मृत्यु भएको प्रहरीले जनाएको छ। उनी मोटसरसाइकलसहित करिब ५० मिटर तल खोलामा खसेको जिल्ला ट्राफिक प्रहरी कार्यालय इलामका हवलदार ऋद्धि खनालले जानकारी दिए। उनीसँगै गएका रामसेवक मोची घाइते भएका छन्। उनको इलाम अस्पतालमा उपचार भइरहेको उनले बताए। मगरको शव अहिले दुर्घटनास्थलबाट निकाल्ने कार्य भइरहेको प्रहरीले जनाएको छ।