धरान–सुनसरीको धरानमा मंसिर १४ गते हुने उपनिर्वाचनका लागि नेकपा र प्रमुख प्रतिपक्षी दल कांग्रेसले चुनावी अभियान तीव्र पारेका छन् । नेकपा र कांग्रेसले अहिलेसम्म उम्मेदवार भने निर्णय गरिसकेका छैनन् । उम्मेदवारबिनै चुनावी अभियानलाई जनतामाझ लगिरहेका छन् । तर नेकपाविरुद्ध धरानमा नेपाली काँग्रेस र अन्य साना दल एक हुने लगभग निश्चित बनेको छ ।
धरान उपमहानगरको मेयरमा तत्कालीन एमालेका तारा सुब्बाले कांग्रेस उम्मेदवार तिलक राईलाई पराजित गरेका थिए । ०७५ साउन १ गते मेयर सुब्बा को निधन भएपछि धरान नेतृत्वविहीन छ । मेयरका लागि नेकपाबाट केन्द्रीय सदस्य किरणकुमार राई, प्रदेश सदस्यहरू विजय राई, मनोजकुमार मेन्याङ्बो, मुक्साहाङ मेन्याङ्बो, जिल्ला सचिव रमेश बस्नेत, जिल्ला सदस्यहरू प्रकाश राई र पदम लिम्बू आकांक्षी छन् । कांग्रेसबाट धरान नगर सभापति तिलक राई र जिल्ला सचिव सुजेन्द्र तामाङले आकांक्षा देखाएका छन् ।
