विराटनगर । मोरङको बुढीगंगा गाउँपालिका–३ बाँसवारीमा सञ्चालित हाईलाइफ चप्पल उद्योग अर्थात सुरभी पोलिमर्स प्रालिले श्रमशोषण गरेको पाइएपछि श्रम कार्यालय विराटनगरले सम्पूर्ण काजगात पेश गर्न आदेश गरेको छ ।
अनुगमनको क्रममा वर्षौदेखि उद्योगमा कार्यरत मजदुरहरुको श्रमशोषण गरेको र सरकारले तोकेको न्युनतम् पारिश्रमिक नदिएको पाइएपछि श्रम कार्यालयले सम्पूर्ण कागजपत्र झिकाउन आदेश गरेको हो ।
कार्यालयले उद्योगलाई आफ्नो ब्यालेन्स सिट, सेलरी शिप, श्रमिकको हाजिरी रजिष्टर, पारिश्रमिक भुक्तानी गरेको भरपाईसमेत एक साताभित्र श्रम कार्यालयमा बुझाउन आदेश दिएको हो । चप्पल उद्योगले श्रमिकहरुको व्यापक रुपमा श्रम शोषण गर्ने गरेको अनुगमनको क्रममा फेला परेपछि उसका कागजपत्र झिकाएको श्रम कार्यालय विराटनगरका प्रमुख मणिनाथ गोपले जानकारी दिनुभयो ।
कार्यालयमा कागजपत्र आएपछि थप कार्वाहीको प्रक्रिया अगाडि बढाउने श्रम कार्यालयले जनाएको छ । श्रमिकलाई भुक्तानी गरेको भरपाइमा श्रम ऐनले तोकेजति तलब नदिएको देखिए लागू गर्न श्रम कार्यालयले आदेश दिनेछ । उद्योगले श्रम ऐन लागू नगरे बैंक खाता रोक्का गर्नेदेखि चलअचल सम्पती रोक्का गर्न सम्बन्धित निकायमा पत्रचार गर्ने कार्यालय प्रमुख गोपले बताउनुभयो ।
करिब २ सय जना कार्यरत मजदुर रहेको उद्योगमा वर्षौदेखि श्रम शोषण भइरहेको श्रम कार्यालय र मजदुर प्रतिनिधिले गरेको अनुगमनको क्रममा देखिएको थियो । उद्योगले श्रमिकलाई श्रम सम्झौतासमेत नगराई काममा लगाएको पाइएको थियो ।
उद्योगमा अनुगमन टोली आएको थाहा पाएपछि मेनेजर कैशाल मण्डलले आफ्नो कर्तुत सार्वजनिक हुने डरले श्रमिकलाई एउटा कोठामा थुनेर राखेका थिए । अनुगमन टोलीलाई श्रम शोषण गरेको पोल खुल्ने डरले करिब ५० जना भन्दा बढी श्रमिकलाई एउटा कोठामा थुनेर राखेको अनुगमनको क्रममा फेला परेको थियो ।
अनुगमनमा नेपाल समाजवादी टे«ड युनियन महासंघका केन्द्रीय उपाध्यक्ष तेजलाल कर्ण, जिफन्ट नेपालको प्रदेश अध्यक्ष किशोर धमला, अखिल नेपाल टे«ड युनियनका प्रदेश उपाध्यक्ष उपेन्द्र राय र नेपाल टे«ड युनियन मोरङका अध्यक्ष शुशिल कोइरालको पनि सहभागिता थियो ।
