तेह्रथुम । तेह्रथुमको छथर गाउँपालिकामा पर्ने पञ्चकन्या र फाक्चामाराका स्थानीयले सरकारसँग पेट भर्नेगरी पिउने पानी उपलब्ध गराईदिन माग गरेका छन् ।
सुख्खाग्रस्त क्षेत्रको रुपमा चिनिएको सो क्षेत्रको अवलोकनमा प्रदेश सरकारका आर्थिक मामिला तथा योजनामन्त्री इन्द्रबहादुर आङ्बोसहितको टोलीसँग स्थानीयले अरु विकासभन्दा पनि पिउने पानी दिन माग गरेका हुन् ।
खडेरी पीडित क्षेत्रको स्थलगत निरीक्षणमा पुगेको टोलीलाई स्थानीयले सडक, विजुली र विद्यालय नभएपनि हुन्छ, तर पानी पेटभरी पिउन पाउने व्यवस्था गरिदिन माग गरेका हुन् । खडेरीले पानीको मुहान सबै सुकेपछि लगाएको बाली पनि खेतमै सुकेकोले सो क्षेत्रका किसान समस्यामा छन् ।
तेह्रथुको छथर गाउँपालिकाको पञ्चकन्या र फाक्चामारा तथा पाँचथरको तुम्बेवा र कुम्मायक गाउँपालिकाका अधिकांश वडा मध्य बर्खामा खडेरीको चपेटमा छन् । पानी नपर्दा स्थानीयले लगाएको बाली सुकेर परालजस्तै भएको छ । प्रदेश सरकारले सो क्षेत्रका स्थानीयको समस्या समाधान गर्न प्रदेश सरकारले मन्त्री आङ्बोको नेतृत्वमा गठन गरेको टोली स्थलगत अनुगमनमा पुगेको हो ।
मन्त्री र सांसदसहितको टोलीलाई स्थानीयले पिउने र सिँचाइका लागि पानी मागेका छन् । टोलीले दुई दिन लगाएर छथर गाउँपालिकाको सुख्खा क्षेत्रको स्थलगत निरीक्षण गरी पीडितसँग छलफल गरेको छ । तेह्रथुमपछि टोली पाँचथर जानेछ ।
खडेरीले अन्नबाली सुकेर भोकमारी लाग्ने अवस्था आएपछि प्रदेश सरकारले पीडित किसानका खेतबारीमै आएर स्थलगत निरीक्षण गरेको मन्त्री आङबोले बताउनुभयो । मन्त्री आङबोको नेतृत्वमा तेह्रथुमका सांसद लक्ष्मण तिवारी, पाँचथरका सांसद प्रतापप्रकाश हाङगाम, आन्तरिक मामिला तथा कानुन मन्त्रालय विपत माहाशाखा प्रमुख रविन्द्र आचार्यसहितको टोली अनुगमनमा आएको हो ।
खेती किसानीबाट मात्र जीवन गुजरा गर्दै आएका पीडित किसानलाई तत्काल राहात उपलव्ध गराउने र ती क्षेत्रमा खडेरीको दिर्घकालीन समाधानका उपायको खोजी गर्ने प्रदेश सरकारले जनाएको छ । मध्य वर्षादमा परेको खडेरीका कारण छथरको वडा नम्बर ३, ४ र ५ का ८ सय ५४ घरधुरी प्रभावित भएको गाउँपालिकाले जनाएको छ । खडेरीले खाद्यान्न अभाव भएपछि तीन वडाका ४ हजार ९ सय २८ जनसंख्या भोकमरीको चपेटामा परेका छन् ।
