विराटनगर । नेकपा एमाले र नेकपा माओवादी केन्द्र एकीकरण भएर नेपाल कम्युनिष्ट पार्टीको गठन भएपछि १ नं. प्रदेश संसदीय दलको पहिलो बैठक बिहीबार बस्यो ।
तत्कालिन नेकपा एमाले संसदीय दलका नेता रहनुभएका मुख्यमन्त्री शेरधन राईको अध्यक्षतामा बसेको बैठकले राईलाई दलको नेता र टंक आङ्बुहाङलाई दलको उपनेता चयन गरेको छ ।
उपनेता चयन गरिएका आङ्बोहाङ तत्कालिन नेकपा माओवादी केन्द्रको संसदीय दलको नेता थिए । दलको प्रमुख सचेतक र सचेतकको निर्णय भने अर्को बैठकबाट लिइने भएको छ । बैठकले दलको प्रदेशसभामा दल एकीकरणको कानुनी प्रक्रियालाई अगाडि बढाउने निर्णय पनि गरेको छ ।
संसदीय दलको बैठकमा सांसदहरुले प्रदेश सरकार र मन्त्रीहरुको कामप्रति खरो टिप्पणी गरेका थिए । उनीहरुले मन्त्रीहरु प्रचारमुखी भएको र योजनाबद्ध काममा भन्दा उद्घाटनमा अल्मलिएको भन्दै यसले प्रदेश सरकारलाई असफल बनाउने खतरा बढेको बताए । मन्त्रीहरुको योग्यतामाथि प्रश्न गर्दै उनीहरुले काम गर्न नसक्नेलाई फिर्ता बोलाउनुपर्ने मागसमेत गरेका थिए ।
सांसदहरुले संघीयतालाई स्थापित गर्नेगरी बजेट संघीय सरकारले ल्याउन नसकेको भन्दै प्रदेश सरकारले आवश्यक पहल गर्न नसकेको गुनासो गरे । प्रदेशका बजेट कम आएकोले जनताको अपेक्षा अनुसार काम हुन नसक्ने उनीहरुको गुनासो थियो ।