विराटनगर । विराटनगर भन्सार कार्यालयले डेढ महिनाअघि देखि ९ बजेपछि कार्यालय संचालन गर्ने निर्णय गरेको भएपनि अझै प्रभावकारी कार्यान्वयन हुन सकेको छैन ।
भन्सारमा अन्तिम समयमा हुने भीडभाड कम गर्न गरिएको उक्त निर्णय कार्यान्वयन गर्न कर्मचारी बाधक बनेको उद्योगी व्यवसायी बताउँछन् । भन्सार कार्यालय भने व्यापारीको बानी नै ढिलो गर्ने लागेको कारण उक्त निर्णय लागू गर्न नसकेको बताउँछ ।
विराटनगर भन्सार कार्यालय आसपासको क्षेत्रमा भीडभाड र ट्राफिक जाम बढेको छ । भन्सार कार्यालयको यार्ड सानो हुँदा मालबहाक ट्रक र सवारी साधन भन्सार कार्यालयदेखि विराटनगरको जुटमिलको खाली जग्गासम्म लाम लागेका छन् । भन्सार कार्यालयले यस्तो चाप हटाउनका लागि बिहान ९ बजे नै एक लट गाडीको चेकजाँच सक्ने र पुनः दिउँसो अर्को लटक चेकजाँच गर्दा भीडभाड हट्ने अपेक्षासहित ९ बजेदेखि नै कार्यालय खोल्न थालेको थियो । तर उक्त निर्णय कार्यान्वयन हुन अझै सकेको छैन ।
भन्सार कार्यालय व्यापारीको बानीमा सुधार नआएसम्म उक्त निर्णय कार्यान्वयन हुन नसक्ने देखिएकोले आवश्यक छलफल र परामर्श गरिरहेको जनाएको छ । विराटनगर भन्सार कार्यालयका प्रमुख मिमांश अधिकारीले उक्त निर्णय कार्यान्वयनमा व्यापारी नै बाधक भएको बताइरहँदा व्यापारी भने भन्सारकै ढिलासुस्तीले यस्तो भएको बताउँछन् ।
मोरङ व्यापार संघका अध्यक्ष पवनकुमार सारडाले क्लियरिङ एजेन्ट नआएका कारण भन्दा पनि भन्सार कार्यालयकै कारण उक्त निर्णय कार्यान्वयनमा ढिलाई भएको बताउनु भयो । भन्सार कार्यालयको परम्परागत सोचका कारण समस्या भएको उहाँको भनाइ छ ।
व्यापार संघका अध्यक्ष सारडाले भीडभाड हटाउनका लागि एकीकृत जाँच चौकी (आइसिपी) निर्माणमा तदारुकता अपनाउनु पर्नेमा जोड दिनुभयो । भन्सार कार्यालय आसपासमा थन्किएका मालबहाक ट्रकको लाइनका कारण सर्वसाधरण आवत–जावतमा पनि समस्या छ । गर्मी, धूलो र भीडभाडका कारण भन्सार क्षेत्रबाट आवत–जावत गर्ने सर्वसाधरणले सास्ती पाइरहेको बताएका छन् ।
