दमक । झापाको दमक नगरपालिका ७ वडाध्यक्ष भीम पौडेलको घर नजिक बम विस्फोट भएको छ। बम विस्फोटमा परी दमक ८ का त्रिलोचन पोखरेल र सेमु राई घाइते भएका छन् ।
इलाका प्रहरी कार्यालय दमकका प्रहरी निरीक्षक मिलन बस्नेतका अनुसार बम विष्फोटमा परी घाइते हुनेहरू श्रीमान श्रीमती हुन्। घाइतेको दमकस्थित लाइफलाइन अस्पतालमा उपचार भइरहेको छ। घाइतेको अवस्था खतरामुक्त रहेको बुझिएको छ । विस्फोटस्थलमा सुरक्षा व्यवस्था कडा बनाइएको प्रहरीले जनाएको छ। राति ९ बजेतिर दमक–६ स्थित पौडेलको घरअगाडि बम विस्फोट भएको हो ।
दमक–७ को सुनलाइनमा रहेको नगरपालिकाको जग्गामा निर्माण गरिएको घरटहरा भत्काउँदा पौडेललाई एक समूहले दबाब दिँदै आएको खुलासा भएको छ । सोही कारणले पौडेललाई निशाना बनाइएको हुनसक्ने प्रहरीले आशंका गरेको छ ।
