दमक । प्रधानमन्त्री केपी शर्मा ओलीले प्रदेश १ को नाम सगरमाथा वा कोशी राख्न सुझाव दिनुभएको छ । उहाँले राजधानी तोक्न ढिलाई भइरहेको बताउँदै प्रदेश सरकारको ध्यानाकर्षणसमेत गराउनु भएको छ ।
झापाको दमकमा खानेपानी आयोजनाको उद्घाटन कार्यक्रमलाई सम्बोधन गर्दै प्रधानमन्त्री ओलीले प्रदेश १ मा सप्तकोशी बग्ने र विश्वमा चिनिएको सगरमाथासमेत भएको उल्लेख गर्दै सोही नाम उपर्युक्त हुने बताउनु भयो ।
‘यस प्रदेशमा सप्तकोशी बग्छ तर, कोशी प्रदेश भन्न हामी सक्दैनौं’, उहाँले भन्नुभयो, ‘विश्वमा चिनिएको सगरमाथा छ तर, सगरमाथा प्रदेश भन्न हामी गाह्रो मान्छौं, त्यसैले यस प्रदेशको नामांकरण गर्न ढिलाई भएको हो ।’
प्रधानमन्त्री ओलीले कार्यक्रममा उपस्थित प्रदेश १ का आन्तरिक मामिला तथा कानुनमन्त्री हिक्मत कार्कीलाई तत्काल नामांकरण र राजधानी तोक्न सुझाव दिनुभयो ।
