अवैध तरिकाले संकलन गरेर थुपारिएको ढुंगाविराटनगर । मोरङको केराबारी गाउँपालिकामा पर्ने चुरे क्षेत्रको खोलाबाट अवैद्य रुपमा ढुंगा, गिट्टी र बालुवाको उत्खनन् हुने गरेको पाइएको छ ।
चुरे संरक्षण क्षेत्रको खदम खोलाबाट अवैध रुपमा ढुङ्गा, गिटी र बालुवासहित सवारी साधन प्रहरीले पक्राउ गरेपछि उक्त रहस्य खुलेको हो ।
प्रहरीले मोरङ केराबारी गाउँपालिका–७ मुगु स्थित खदम खोलाबाट अवैध रूपमा ढुंगा चोरी पैठारी गरी स्टोक गरी राखेको ठाउँबाट जेसिबी र टिफर नियन्त्रणमा लिएको मोरङ प्रहरीले जनाएको छ ।
प्रहरीले अन टेष्ट जेसिबी मेसिनले ना ७ ख ६९१२ नं. को टिफरमा ढुंगा उठाई रहेको अवस्थामा बरामद गरेको मोरङ प्रहरी प्रमुख एसपी अरुणकुमार बिसीले जानकारी दिनुभयो ।
प्रहरीका अनुसार बरामद गरेको दुवै सवारी साधनलाई पक्राउ गरी स्टोक गरिएको अन्दाजी ४ हजार ५ सय घनमिटर ढुंगासमेत सिज गरी आवश्यक कारवाहीको लागि ईलाका वन कार्यालय केराबारीमा बुझाईएको छ ।
प्रहरीले १५ दिनको अवधीमा चुरे संरक्षण क्षेत्रमा अवैध ढुंगा, गिट्टी बालुवा उत्खनन् तथा ओसार पसारमा संलग्न ५ वटा टिफर, ४ वटा ट्याक्टर र ४ वटा जेसिवी गरी १३ वटा सवारी साधन र अन्दाजी ५ हजार घनमिटर ढुंगा पक्राउ गरी आवश्यक कारवाहीको लागि सम्बन्धित कार्यालयमा बुझाएको छ ।
