उर्लाबारी । मोरङको उर्लाबारीस्थित सोल्टी र मिक्लुक खोलाबाट नदीजन्य पदार्थ निकासी गर्न रोक लगाइएको छ ।
गत शनिबार प्रदेश नं. १ का आन्तरिक मामिला तथा कानून मन्त्री हिक्मत कार्की, मोरङ क्षेत्र नं. १ का प्रदेश सांसद कुशल लिम्बू, मोरङका प्रमुख जिल्ला अधिकारी रामप्रसाद आचार्यले प्राकृतिक स्रोतको दोहन भएको ठहर गरेका थिए ।
मन्त्री कार्कीसहितको अनुगमन टोलीले सोल्टी र मिक्लुक खोलामा भएको प्राकृतिक स्रोत उत्खनन् मापदण्ड विपरित भएको भन्दै त्यसलाई रोक्न प्रजिअ आचार्यलाई निर्देशन दिएका थिए । सोही निर्देशनअनुसार प्रजिअ आचार्यले स्थानीय प्रशासनलाई खोलाबाट अबैध निकासी रोक्न निर्देशन दिएपछि निकासी रोकिएको हो ।
उर्लाबारी नगरपालिकाका प्रमुख खड्गबहादुर फागोकै निर्देशनमा पूर्वका नामुद ठेकेदार भीम पौडेललाई निकासीको जिम्मा दिएको बताइन्छ । प्रजिअ आचार्यका अनुसार ‘च्यानलाइज’का नाममा बालुवा र मिसगिट्टी निकासी गरी बिक्री गरेको पाइएको छ । सोल्टी खोलामा मापदण्ड विपरित ३ किलोमिटरसम्म बालुका र गिट्टी उत्खनन् गरिएको स्रोतको भनाई छ ।
यस्तै, मिक्लुक खोलामा पनि ५ सय मिटरसम्म अवैध ढंगले मिसगिट्टी निकालेर विक्री गर्ने गरेको पाइएको छ । अबैध तरिकाले नदीजन्य पदार्थ निकासीका विषयमा छानविन गर्ने तयारी थालिएको जनाइएको छ । बालुवा र मिसगिट्टी प्रति टिफरको ६ सय ७५ रुपैयाँ कर र ८ सय रुपैयाँ लोडिङ बापत रकम लिएर निकासी हुँदै आएको तथ्य फेला परेको छ । यस घटनाका बिषयमा ब्यापक छानविन गर्ने र दोषीलाई कार्वाही गर्ने मन्त्री कार्कीले स्थानीयलाई आश्वासन दिएका थिए ।
