विराटनगर । १ नम्बर प्रदेशसभा संसदमा गाउँसभा र नगरसभा संचालन कार्यविधि (विधेयक) २०७४ पेश भएको छ ।
शुक्रबार बसेको संसद बैठकमा प्रदेश सरकारका तर्फबाट आन्तरिक मामिला तथा कानून मन्त्री हिक्मत कार्कीले गाउँसभा र नगरसभा संचालनका लागि बनेको कार्यविधि विधेयक संसदमा प्रस्तुत गर्नुभएको हो । सामान्य छलफल पछि उक्त विधेयकमा संशोधन दर्ता गराउन ७२ घण्टाको समय दिइएको छ ।
यसअघि संसदको शून्य समयमा बोल्दै सांसदहरुले विभिन्न जनसरोकारका विषय उठाएका छन् । धरान सुनसरीकी सांसद सावित्री जोशीले सुनसरीको धरानलाई राजधानी बनाउनु पर्ने माग गर्नुभयो । उहाँले हावापानी, भूगोल र भौतिक संरचनाको हिसावले धरान उपर्युक्त भएको दाबी पेश गर्नुभयो ।
संसद बैठकमा बोल्दै सांसद विद्यानन्द चौधरीले विराटनगर–गौरिगंज सडकमा पर्ने रतुवामाईमा बनेको पुल निर्माण नसकिएको भन्दै सरकारको ध्यानाकर्षण गर्नुभयो । उहाँले पिछडिएका दलितको नागरिकता पाउने अधिकारबाट बञ्चित भएको भन्दै सरकारले वैकल्पिक व्यवस्था गरेर नागरिकता दिनुपर्ने बताउनु भयो ।
यस्तै मोरङका सांसद लिलाबल्लभ अधिकारीले बक्राहा, मरिया, डाँस, चिसाङ, लोहन्द्रा जस्ता खोलाका कारण जनता आक्रान्त भएको भन्दै तटबन्ध नियन्त्रणका लागि प्रदेशसरकारको ध्यानाकर्षण गराउनु भयो ।
सुनसरीका सांसद मोहम्मत ताहिर अन्सारीले कोशी टप्पुका जनावर अर्ना, हात्ती र बँदेलको आक्रमणबाट जनता आजित भएको भन्दै उचित व्यवस्थापनको माग गर्नुभएको थियो ।
