विराटनगर । विराटनगरस्थित भारतीय दुतावासको सम्पर्क कार्यालय बाहिर बम विष्फोट भएको छ ।
जिल्ला प्रहरी कार्याल मोरङका प्रमुख एसपी अरुणकुमार बिसीले दिएको जानकारी अनुसार घटना साँझ ८ बजेर १५ मिनेट जाँदा भएको हो । एम्बेसीको सम्पर्क कार्यालय विराटनगर महानगरपालिका वडा नम्बर १३ मा रहेको छ ।
कार्यालय अगाडिको चौरमा बम विष्फोट हुँदा एम्बेसीको सम्पर्क कार्यालयको पर्खालमा क्षति पूगेको एसपी बिसीले जानकारी दिनुभयो ।
‘घटनाको विषयमा थप अनुसन्धान भइरहेको छ’, बिसीले भन्नुभयो, ‘कस्ले र किन गराएको भन्ने विषय खुलेको छैन, केही हुलिया पत्ता लागेको छ छिट्टै हामी अपराधिलाई पक्राउ गर्छौं ।’
क्याम्पको खाली जग्गामा तर्साउने गरि गराईएको बिस्फोट भनिएपनि प्रेसरकुकर बम रहेको प्रहरीले आशंका गरेको छ ।
रातको समय भएको कारण अनुसन्धान र घटनास्थलमा केही प्रमाण फेला पार्न नसकेको बिसीको भनाइ छ । घटनामा विप्लव माओवादीले गराएको हुनसक्ने प्रहरीले आशंका गरेको छ ।
