विराटनगर । भारत भ्रमणमा रहनुभएका प्रधानमन्त्री केपी ओलीलाई भारतको एक विश्वविद्यालयले विद्यावारिधीको उपाधि प्रदान गरेको छ ।
भारत भ्रमणको अन्तिम दिन प्रधानमन्त्री ओलीलाई उत्तराखण्डको डा.गोविन्द वल्लभ पन्त कृषि तथा प्रविधि विश्वविद्यालयले मानार्थ विद्यावारिधि उपाधि प्रदान गरेको हो ।
भारत भ्रमणको समयमा नेताहरुलाई विद्यावारिधीको उपाधि दिने चलन नै बसेको छ । नेपालमा प्रजातन्त्र आएपछिको अन्तरिम प्रधानमन्त्री कृष्णप्रसाद भट्टराईलाई दिल्ली विश्वविद्यालयले त्यस्तो मानार्थ दिएको थियो । यस्तै सन् २०१६ मा भारतको दिल्लीस्थित जवाहरलाल नेहरु विश्वविद्यालयबाट पूर्वप्रधानमन्त्री एवं नेपाली कांग्रेसका सभापति शेरबहादुर देउवाले पनि मानार्थ पीएचडीको उपाधि पाएका थिए ।
प्रधानमन्त्री ओलीले डा.गोविन्द वल्लभ पन्त कृषि तथा प्रविधि विश्वविद्यालय र त्यहाँको ब्रिडर सिड प्रोडक्सन सेन्टरको अवलोकन गरेपछि मानार्थ विद्यावारिधीको सम्मान पाउनसभएको हो । सो विश्व विद्यालय भारतका पहिलो प्रधानमन्त्री जवाहरलाल नेहरुको विशेष पहलमा स्थापना भएको हो ।
ओलीको यो दोस्रो मानार्थ पीएचडी हो। यसअघि ८ वर्षअघि ओलीलाई काठमाडौंमै ग्रिनफ्रोर्ड युनिभर्सिटीले मानार्थ पीएचडीको उपाधि दिएको थियो । ओलीसँगै नेता विजयकुमार गच्छदार, कलाकारहरु मदनकृष्ण श्रेष्ठ, हरिवंश आचार्य, कान्तिपुर पब्लिकेशन्सका तत्कालीन निर्देशक रामेश्वर थापा लगायतलाई सो युनिभर्सिटीले मानार्थ पीएचडी दिएको थियो ।
सो विश्वविद्यालय फर्जी भएको खुलेपछि मह जोडी, थापा लगायतले उपाधि फिर्ता गरेका थिए । ओलीले भने आफूले कुरा बुझेरै मानार्थ विद्यावारिधि लिएको हुनाले उपाधि फिर्ता नगर्ने बताउनुभएको थियो ।
विद्यार्थीको ध्यानाकर्षण गराउन तथा राजनीतिक फाइदाका लागि विभिन्न विश्वविद्यालयहरुले सम्बन्धित व्यक्तिहरुलाई मानार्थ उपाधि दिने गरेका छन् ।
