विराटनगर । भेटेरिनरी डाक्टर तथा औषधि व्यवसायीहरुले सरकारले पशुपंक्षीका लागि आयात हुने एन्टिबायोटिक औषधिमा रोक लगाएको भन्दै विरोध गरेका छन् । उनीहरुले पशुपंक्षी मन्त्रालय पुनः स्थापना र छुट्टै औषधि व्यवस्था विभागको माग पनि गरेका छन् ।
विराटनगरमा शनिबार आयोजित नेपाल भेटेरिनरी एसोसिएसन १ नम्बर प्रदेशको अधिवेशनमा सहभागी डाक्टरले एन्टिबायोटिक औषधि आयातमा रोक लगाएर सरकारले करोडौं लगानी जोखिममा पारेको बताएका छन् । भेटेरिनरी औषधि व्यवसायी संघ १ नम्बर प्रदेशका उपाध्यक्ष ऋषि बच्चनले पशुपंक्षी बिरामी भयो भने त्यसको उपचार गर्न एन्टिबायोटिक नहुँदा करोडौं लगानी जोखिममा परेको बताउनु भयो ।
कार्यक्रममा सहभागी नेपाल भेटेरिनरी एसोसिएसनका महासचिव राजेन्द्र यादवले सरकारले पशुपंक्षी मन्त्रालय स्थापना नगरे आन्दोलन गर्ने बताउनु भयो । उहाँले भटेरिनरीको विकासका लागि सरकारसँग कुरा गरेको र त्यसका लागि पशुपंक्षी मन्त्रालय स्थापना गरेर लाग्नुपर्नेमा जोड दिनुभयो ।
कार्यक्रममा बोल्दै पशु सेवा विभागका पूर्व प्रमुख डाक्टर प्रल्हाद सापकोटाले भेटेरिनरी औषधि व्यवस्था गर्न छुट्टै औषधि व्यवस्था विभाग खडा गर्नुपर्नेमा जोड दिनुभयो । उहाँले प्रत्येक किसानसँग जोडिएका भेटेरिनरी क्षेत्रको माग पुरा गराउन किसानसँगै सहकार्य गर्नुपर्नेमा जोड पनि दिनुभयो ।
कार्यक्रममा पूर्वाञ्चलका ७० भन्दा बढी भेटेरिनरी डाक्टरहरुको सहभागीता छ । एसोसिएसनको १ नम्बर प्रदेश समिति चयन गर्दै अधिवेशन सकिएको छ । एसोसिएसनको केन्द्रीय अधिवेशन भेटेरिनरी कन्फ्रेन्स आगामि जेठ ९ देखि ११ गतेसम्म काठमाडौंमा चल्ने बताइएको छ ।
