ज्ञापन पत्र बुझाउन मुख्यमन्त्री राईसँग पुगेका किसानविराटनगर । अण्डा उत्पादक किसानले कुखुराको बिमा गरेको भएपनि बिमा कम्पनीले क्षतिपूर्ति दिन नमानेको बताएका छन् ।
विराटनगरस्थित मुख्यमन्त्री तथा मन्त्रिपरिषद्को कार्यालयमा पुगेर मुख्यमन्त्री शेरधन राईसँग बुधबार किसानहरुले बिमा कम्पनीले दिनुपर्ने क्षतिपूर्ति वापतको रकम पनि दिन आलटाल गरेको गुनासो गरेका हुन् ।
उनीहरूले कुखुराको दानाको मूल्य मनोमानी ढंगले वृद्धि गरिएको, वर्डफ्लु जस्ता महामारीबाट नष्ट भएका कुखुराको विमा कम्पनीले क्षतिपूर्ति नदिएको, सहुलियत दरमा बैंकले कृषि अनुदान कर्जा नदिएकोलगायतका गुनासो गरेका छन् ।
नेपाल अण्डा उत्पादक संघ मोरङका अध्यक्ष विनोद अधिकारीले किसानको समस्या समाधान नभए पलायन हुनुपर्ने अवस्था आएको गुनासो गर्नुभयो ।
उहाँले भारतबाट कुखुरा र अण्डा आयातमा रोक लगाइएको भएपनि अझैसम्म आयात भइरहेकाले स्वदेशी उत्पादन मारमा परेको बताउनु भयो । भारतमा अण्डा उत्पादन तथा कुखुरापालनमा सरकारले कृषकलाई धेरै अनुदान प्रदान गरेकाले उत्पादन लागत कम पर्ने हुँदा भारतीय अण्डा नेपाल आयात भइरहेको भन्दै भन्सारबाटै कडाइ गर्न पनि किसानले माग गरेका छन् ।
किसानको टोलीले मुख्यमन्त्रीलाई ज्ञापनपत्र समेत बुझाएको छ । ज्ञापन पत्र बुझ्दै मुख्यमन्त्री राईले कृषि र कृषकलाई प्राथमिकतामा राखेर प्रदेश सरकारले बजेट ल्याउने आश्वासन दिनुभयो । उहाँले कृषकलाई दिइनुपर्ने सहुलयत, बजार व्यवस्थापन, अनुदान लगायतका विषयमा प्रदेश सरकार गम्भीर रहेको बताउनुभयो ।
