विराटनगर । एक नम्बर प्रदेश सरकारको प्रमुख न्यायाधिवक्ता चयन हुनुभएका विराटनगरका बरिष्ठ अधिवक्ता चुडामणी आचार्यले सोमबार पद तथा गोपनियताको शपथ लिनुभएको छ ।
एक नम्बर प्रदेश प्रमुखको कार्यालयले सोमबार आयोजना गरेको एक समारोहमा उच्च अदालत विराटनगरका मुख्यन्यायाधिस कुलरत्न भुर्तेलले न्यायाधिवक्ता आचार्यलाई पद तथा गोपनियताको सपथ खुवाउनुभएको हो ।
आचार्यले नेपाली जनताको नाममा शपथ लिनुभएको छ । मुख्यमन्त्री तथा मन्त्री परिषद्को कार्यालयले संविधानको धारा १६० को उपधारा २ बमोजिम फागुन २४ गते आचार्यलाई प्रमुख न्यायाधिवक्ता चयन गर्न प्रदेश प्रमुखको कार्यालयलाई सिफारिस गर्नुभएको थियो ।
सोहि बमोजिम प्रदेश प्रमुख गोविन्दबहादुर तुम्बाहाङले आचार्यलाई न्यायाधिवक्तामा नियुक्ती गर्नुभएको थियो । प्रमुख न्यायाधिवक्ता प्रदेश सरकारको कानुनी सल्लाहकार हो । २०४६ सालबाट वकालत सुरु गर्नुभएका आचार्य नेपाल बार एशोसिएन मोरङका अध्यक्ष र केन्द्रीय उपाध्यक्षसमेत भइसक्नु भएको छ ।
