विराटचोक । एभरेष्ट बैंकले मोरङको सुन्दरहरैंचास्थित विराटचोकमा एक्सटेन्सन काउन्टर स्थापना गरेको छ ।
आइतबार एक कार्यक्रमकाबीच सुन्दरहरैंचा नगरपालिकाका प्रमुख शिवप्रसाद ढकालले काउन्टरको उद्घाटन गर्नुभयो । कार्यक्रममा बोल्दै मेयर ढकालले काउन्टरलाई शाखाको रुपमा विकास गर्नुपर्नेमा जोड दिनुभयो । सो अवसरमा कोशीहरैंचा उद्योग वाणिज्य संघका अध्यक्ष नवराज चापागाईं, पीएलओ ग्रुपका अध्यक्ष भोला दुलाल, बैंकका सीइओ सोमेश्वर सेठ लगायतले आ–आफ्ना धारणा राख्नु भएको थियो ।
एभरेष्टले विराटचोकमा इटहरी शाखाको एक्सटेन्सन काउन्टर स्थापना गरेको हो । काउन्टरबाट ऋण प्रवाह बाकेकका सबै सेवा उपलब्ध हुने काउन्टर इञ्चार्ज पर्शुराम सुवेदीले जानकारी दिए । देशभर ८० वटा शाखा रहेको एभरेष्ट बैंकको एक्सटेन्सन काउन्टर भने विराटचोकसहित ७ वटा पुगेको छ ।
बैंकको देशभर १ सय १३ वटा एटीएम र २८ वटा राजश्व संकलन शाखा छन् । विराटचोकमा स्थापना गरिएको काउन्टरलाई चाँडै शाखाको रुपमा विकास गरिने इञ्चार्ज सुवेदीले जानकारी दिए । एभरेष्टको काउन्टर स्थापना भएसँगै विराटचोकमा कार्यलय स्थापना गरेर सेवा दिने बैंकको संख्या २८ पुगेको छ ।
