विराटनगर । विराटनगर इटहरी हुदै धरान जोड्ने ६ लेन सडक परियोजनाको दुहबी खण्डको बिवाद नमिल्दा ठेक्का प्रक्रिया लम्बिएको छ । व्यापारिक लोकमार्ग मार्ग अन्तरगत दुहबी खण्डमा जग्गा अधिग्रहणको विवाद नमिल्दा ठेक्का प्रक्रिया लम्बिएको हो ।
परियोजनाले चालु आर्थिक वर्ष भित्र सडकको सबै क्षेत्र ठेक्का लगाउने तयारी गरेको थियो । तर जग्गा विवाद नसुल्झिएका कारण समस्या भएको परियोजनाले जनाएको छ । छ लेन सडक परियोजना मध्ये विराटनगर बजार क्षेत्रमा ३० मिटर सडक चौडा बनाइएको छ । न्यूनतम मापदण्डमा ३० मिटर हुनुपर्ने भएकाले दुहबीमा पनि हाल सोही कायम गर्न लागिएको छ । परियोजना अन्तरगत दुहवी क्षेत्रमा १७ मिटर मात्र सडक रहेको छ ।
परियोजनाको ३९ किलोमिटर मध्ये ३४ किलोमिटर क्षेत्र निर्माणकालागि ठेक्का लागिसकेको छ । ठेक्का लाग्न बाकी रहेको मध्ये दुहबी बाहेक अन्य क्षेत्रमा प्रक्रियामा रहेको विराटनगर–धरान सडक परियोजनाका प्रमुख विनोदकुमार मौवारले जानकारी दिनुभयो ।
६ लेन परियोजना अन्तरगत विराटनगर क्षेत्रमा काम द्रुत गतिमा सञ्चालन गरिएको परियोजनाले जनाएको छ । विराटनगर महानगरपालिकाले व्यस्त सडकको ९ किलोमिटर छिटोभन्दा छिटो बनाउन आफूहरुले पहल गरेको माहानगरका प्रमुख भीम पराजुलीले बताउनु भयो ।
परियोजनाकालागि चालु आर्थिक बर्षमा ६० करोड बजेट विनियोजन भएको छ । बजेट अपुग भएका कारण थप दश करोड माग गरिएको छ । २०७५/०७६ भित्र काम सक्नु पर्ने परियोजनाको समय सिमा सकिन एक बर्ष बाँकी रहँदा ५ किलोमिटर क्षेत्र ठेक्का लगाउन बाँकी रहेको छ । हालसम्म परियोजनाको ३०.४० प्रतिशत काम मात्रै सकिएको छ ।
