काठमाडौं । नेपालको तेस्रो राष्ट्रपतिमा विद्यादेवी भण्डारी दोस्रो कार्यकालका लागि निर्वाचित हुनुभएको छ । राष्ट्रपति चयनका लागि मंगलबार भएको निर्वाचनमा दुईतिहाईभन्दा बढि मत प्राप्त गर्दै भण्डारीले नेपाली कांग्रेसका उम्मेदवार कुमारी लक्ष्मी राईलाई पराजित गर्नुभएको हो ।
वाम गठबन्धनकी उम्मेदवार भण्डारीले ३९ हजार २ सय ७५ मतभार प्राप्त गर्दा राईले ११ हजार ७ सय ३० मतभार प्राप्त गरेको निर्वाचन आयोगले जनाएको छ ।
भण्डारीलाई २४५ संघीय सासद र ४१५ प्रदेशसभा सदस्यले मत दिएका थिए । राईलाई भने ७८ संघीय सांसद र ११६ प्रदेशसभा सदस्यले मत दिएका छन् । तीन संघीय सांसद र ५ प्रदेशसभा सदस्यको मत भने दबर भएको छ ।
निर्वाचनमा संघीय संसदका ३३१ र प्रदेशसभाका ५३६ सदस्यले मततदान गरे । संघीय संसदका ५ र प्रदेशसभाका १४ सदस्यले भने मतदान गरेनन् । नयाँ शक्ति, नेमकिपा र विवेकशील साझा पार्टीले मतदान नगर्ने निर्णय गरेका थिए ।
राष्ट्रपति र उपराष्ट्रपति निर्वाचनको लागि संघीय संसदको एक सदस्यको मतभार ७९ तोकिएको थियो भने प्रदेशसभा सांसदको मतभार ४८ रहेको थियो ।
यसैबीच दोस्रो कार्यकालको लागि राष्ट्रपति बन्नुभएकी भण्डारीले बुधबार पद तथा गोपनीयताको सपथ लिनुहुने भएको छ । सपथको समय बुधबार दिउँसो ४ बजेका लागि तोकिएको छ । राष्ट्रपतिलाई प्रधानन्यायाधीशले सपथ गराउने प्रचलन छ ।
कस्तो छ, भण्डारीको विगत ?
दोस्रो कार्यकालका लागि निर्वाचित भण्डारीको नाममा नेपालको पहिलो महिला राष्ट्रपतिको इतिहास लेखिएको छ । २०७२ कात्तिक ११ मा गणतन्त्र नेपालको दोस्रो राष्ट्रपतिका रूपमा निर्वाचित भण्डारी त्यसअघि एमालेको दुई कार्यकाल उपाध्यक्ष, सांसद र मन्त्री हुनुभएको थियो ।
दासढुंगामा मारिएका एमालेका तत्कालीन महासचिव मदन भण्डारीकी पत्नी भण्डारी पञ्चायतकालदेखि नै विद्यार्थी राजनीतिमा सक्रिय हुनुहुन्थ्यो । तर, राजनीतिक सक्रियता भने श्रीमान्को निधनपछि बढेको हो । श्रीमान्को निधनपछि २०५० सालमा काठमाडौं–१ को उपनिर्वाचनमा पूर्वप्रधानमन्त्री कृष्णप्रसाद भट्टराई हराएपछि उहाँ एमाले राजनीतिको अग्रभागमा देखिनुभएको थियो ।
महेन्द्र मोरङ क्याम्पस विराटनगरको स्ववियु कोषाध्यक्ष हुँदै भण्डारीले एमाले भातृ संगठन अनेमसंघको अध्यक्षको भूमिकासमेत निर्वाह गरिसक्नुभएको छ ।
राष्ट्रपति भएपछि भण्डारीको प्रत्यक्ष दलीय आवद्धता त समाप्त भयो, तर शितल निवासमा रहेर एमालेभित्रको गुट चलाएको आरोप भण्डारीमाथि पार्टी भित्रैबाट लाग्ने गरेको छ ।
