विर्तामोड । सुनचाँदी व्यवसायी साजन मुखियाको हत्याको बिरोधमा बिर्तामोड उद्योग बाणिज्य संघ र सुनचाँदी व्यवसायी संघले आज बिर्तामोड बन्द गरेको छ । व्यवसायीले बिरोध र्यालीसहित बजार बन्द गरेका हुन् ।
सुनचाँदी कारोवारको बिषयलाई लिएर मुखियाको हत्या भएको बताइएको छ । प्रहरीले हत्यामा संलग्न रहेको आशंकामा २० जना भन्दा बढी पक्राउ परेका छन् । पक्राउ परेकाहरु विरुद्ध अदालतमा म्याद थप गरी सार्वजनिक गर्ने तयारी गरेको प्रहरीले जनाएको छ ।
पक्राउ परेका व्यक्ति इलाका प्रहरी कार्यालय बिर्तामोडको हिरासतमा छन् । बिर्तामोड स्थित कृषिथोक लाइनको राधे रिद्धिसिद्धी ज्वेलर्सका संचालक पारस देवको योजनामा मुखियाको हत्या भएको प्रहरी स्रोतको भनाइ छ । स्रोतका अनुसार उनलाई ओली र पौडेल थरका दुई युवा सहयोग गरेका थिए । स्रोतका अनुसार देवले सुनचाँदीको लगभग ७० लाख भन्दा बढी मुखियालाई बुझाउन बाँकी रहेको थियो ।
देव भारतको सिलिगुडीमा नेपालबाट सुनचाँदी तस्करी गर्दै आएको बताइएको छ । फागुन २० गतेबाट हराएका मुखियाको धारिलो हतियार प्रयोग गरी हत्या गरी इलामको रोङ गाउँपालिका–३ कोल्बुङ स्थित सडकबाट करिब २० फिट तल जुटको बोरामा राखेर फालिएको अवस्थामा शव फेला परेको हो ।
पछाडि हात बाँधिएको र अनुहार काटिएको अवस्थामा मुखियाको शव भेटिएको रोङ प्रहरीले जानकारी दिएको छ । बिर्तामोडस्थित दावा ज्वयलर्स सुनचाँदी पसलका सञ्चालक मुृखिया फागुन २० गते श्रीमती रवीनालाई बजार जाने भन्दै बाहिरिएका थिए ।