काठमाडौँ । सर्वोच्च अदालतका न्यायाधीश चोलेन्द्रशमशेर जवराले प्रधानन्यायाधीश गोपाल पराजुलीले गत साउन २१ मै अवकाश पाइसकेको भन्दै पराजुलीसँगको इजालस बहिष्कार गरेको भोलिपल्ट मंगलबार प्रधानन्यायधिस पराजुलीले नियमित झै पेशी तोक्नुभएको छ ।
प्रधानन्यायधिस पराजुलीले नियमित झै मंगलबारको लागि पनि जवरा बाहेकका न्यायधिसको पेशी तोक्नुभएको छ । यद्यपी जबराको बहिष्कारको कारण सोमबार स्थगित भएको कान्तिपुर विरुद्धको मुद्दाको भने पेशी तोकिएको छैन ।
जवराको रायपछि सोमबार अधिकांश न्यायाधीशले प्रधानन्यायाधीश पराजुलीलाई विदामा बस्न सुझाव दिएका थिए। तर, पराजुलीले मंगलबार आफूसहितको बेञ्च गठन गरेर पेसी तोक्नुभएको हो । दैनिक पेशी तोक्ने काम प्रधानन्यायाधीशले गर्ने परम्परा छ ।
आज पूर्ण बाहेक दश इजलास गठन गरिएका छन् । पराजुलीसँग न्यायाधीश तेजबहादुर केसीको इजलास तोकिएको छ । सुनुवाइ जारी रहेको डा.गोविन्द केसी र कान्तिपुर पव्लिकेशनविरुद्धको अपहेलना मुद्दाको बाँकी प्रक्रिया भने अनिश्चित बनेको छ ।
स्रोतका अनुसार न्यायाधीश जबरामाथि अदालतको अवहेलनाको मुद्दा दर्ता गर्ने तयारी गरिएको छ । संभवत मंगलबार नै त्यो प्रक्रिया बढ्ने छ ।
यसैबीच प्रधानन्यायाधीशले सोमबार राति राष्ट्रपतिसँग भेटवार्ता गरेको बुझिएको छ । राष्ट्रपतिसँगको अर्थपूर्ण भेटघाटको अतिरिक्त विवरण सार्वजनिक हुन बाँकी छ ।