विराटनगर । बिरामी ठगी गर्ने दुई जना दलाललाई मोरङ प्रहरीले बुधबार विराटनगरबाट पक्राउ गरेको छ । क्लिनिकहरुले दलाललाई दिने कमिसनको लोभमा विरामीहरुलाई ठगी गर्नेहरुलाई मोरङ प्रहरीले पक्राउ गरेको हो ।
सादा पोशकमा खटिएको प्रहरीले सप्तरीको राजबिरज घर भई विराटनगरमा डेरा वस्ने ३२ वर्षीय सिताराम सरदार र जनकपुर घर भइ विराटनगर बस्ने उमेश महतोलाई पक्राउ गरेको हो । पक्राउ गरेकाहरुले दलालले उपचारको लागि विराटनगर आएका विरामीलाई हस्पिटल चौकमा रहेको राजु साहले सञ्चालन गरेको नेशनल क्लिनिकमा जबरजस्ती र झुक्याएर लैजाने गरेका थिए ।
विरामीलाई लगेवापत क्लिनिकले दलाललाई एक पटकमा ५ सय रुपैयाँ दिने गरेको पाइएको प्रहरीले जनाएको छ । विराटनगरको हस्पिटलमा चौकमा रहेको अधिकांश क्लिनिक र कतिपय निजी अस्पतालहरुले पनि विरामी ल्याउन कमिसन दिएर दलालहरु परिचालन गर्ने गरेका छन् ।
ती दलालहरुले विराटनगरको बसपार्कसहितका विभिन्न स्टेण्डमा बसेर विरामीलाई झुक्याएर आफ्नो कमिसन आउने क्लिनिक तथा अस्पतालमा लैजाने गरेका छन् । यसरी दलाल प्रयोग गरी विराटनगरमा क्लिनिकले विरामी ठगी गरेको पाइएपछि मोरङ प्रहरीले विशेष निगरानी गर्दै आएको जनाएको छ ।
पक्राउ परेका दलाललाई प्रहरीले थप अनुसन्धानपछि मात्र मुद्दा चलाउने मोरङ प्रहरीले जनाएको छ ।
