विराटनगर, १९ फागुन : मोरङ उर्लाबारी ७ का ३६ वर्षीय सुन कारोबारी सनम शाक्यको हत्या भएको छ ।
विराटनगर–३ दुर्गाचोकमा शनिबार दिउँसो शाक्यको शव स्कोर्पियो गाडीमा भेटिएको थियो । उनको शव गाडीमा राखेर लुकाउने प्रयास गर्ने ३ जनालाई प्रहरीले पक्राउ गरेको छ । पक्राउ पर्नेको नाम प्रहरीले औपचारिक रुपमा सार्वजनिक गर्न नचाहे पनि काभ्रेका टेकराज मल्ल, मोरङका नरेन्द्र कार्की र मोहन काफ्ले रहेको बताइएको छ ।
अपराध अनुसन्धान महाशाखा (सिआईबी) काठमाडौंले कुनै व्यक्ति हत्या गरेर ‘डिस्पोज’ गर्ने योजनामा रहेको विशेष सूचनासहित ‘फलो’ गरिरहेको गाडीलाई मोरङ प्रहरीको सादा पोशाकमा खटिएको टोलीले विराटनगरमा नियन्त्रणमा लिन सफल भएको हो ।
प्रहरीले शव राखेर ल्याउँदै गरेको बा १२ च ५९६३ नम्बरको स्कोर्पियो गाडी पनि नियन्त्रणमा लिएको छ । मोरङका प्रहरी उपरीक्षक अरुणकुमार बिसीले महाशाखाको विशेष टोलिले पाएको सुचनाका आधारमा गाडीलाई पछ्याईएको जानकारी दिनुभयो । बरामद भएको शव उर्लाबारी थाना अगाडि घर भएका सनम शाक्यको रहेको प्रहरीले जनाएको छ ।
उर्लाबारीका शाक्य अवैध सुनको कारोबारमा संलग्न रहेको आशंका प्रहरीले गरेको छ । अवैध सुनको कारोबारी भएका कारण हत्याको अनुसन्धान थप जटिल बन्ने र अन्य विषयसमेत बाहिर आउन सक्ने भएका कारण प्रहरीले नियन्त्रणमा लिइएका तीन जनाको नाम खुलाउन चाहेको छैन । सुन तथा चाँदी पसल सञ्चालन नगरेका शाक्य अदृश्य रुपमा सुनको कारोबार भने गर्दै आएको बुझिएको छ ।
फागुन १५ गते मोरङ उर्लाबारी–७ बस्ने सनम शाक्यलाई सुन तस्करीको लेनदेनमा कुरा नमिलेपछि तीन जनाले अपहरण गरेर सिराहा जिल्लाको अज्ञात स्थानमा लगेर शरीर बन्धक बनाई हत्या गरेको प्रहरीको दाबी छ ।
शनिवार प्रहरीले बिराटनगर स्थित पोखरिया कन्या मार्गमा टेकराज मल्लले चलाएको बा. १२ च ५९३३ नम्बरको क्रिम कलरको स्कोरपियो चेकजाँच गर्दा सोही गाडीको डिकीमा सनमको शव फेला परेको थियो । गाडीको डिकीभित्र तौलिया, म्याट्रेस र त्रिपालले लुकाई राखेको अवस्थामा भेटिएको सनमको शरिर भरी निलडाम भएको महाशाखाले जनाएको छ ।
