विराटनगर । होलीमा अवान्छित गतिविधि गर्ने मोरङमा १ सय बढी ब्यक्तिलाई प्रहरीले नियन्त्रणमा लिएको छ । मादक पदार्थ सेवन गरेर होहल्ला र झैझगडा गर्ने, होलीको अवसरमा अवान्छित गतिविधि गर्ने १ सय ८ जनालाई जिल्लाका विभिन्न स्थानबाट नियन्त्रणमा लिइएको मोरङ प्रहरीले जनाएको छ ।
यस्तै मापसे गरेर तथा सवारी नियम उल्लंघन गरेर कुदाईएका ४ सय १४ वटा मोटरसाईकल र दुई वटा चार पाङ्ग्रे सवारी साधनसमेत नियन्त्रणमा लिइएको जिल्ला प्रहरी कार्यालय मोरङका प्रमुख एसपी अरुणकुमार बिसिले जानकारी दिए । नियन्त्रणमा लिइएका ब्यक्तिहरुलाई कसुर अनुसारको कारबाही गरिने र सामान्य प्रकृतिका घटनामा संलग्नलाई अभिभावकको जिम्मा लगाईने उनले जानकारी दिए ।
नियन्त्रणमा लिइएका सवारीसाधनको ब्लुबुक हेर्ने काम भईरहेको जानकारी दिंदै उनले नियन्त्रणमा लिइएका सवारीधनीसँग नियम अनुसारको जरिवाना असुल गरिने बताए । होलीको क्रममा विभिन्न ठाउँमा झडपका सामान्य घटनाहरु भएपनि गम्भीर प्रकृतिको घटना भने नभएको जिल्ला प्रहरी कार्यालय मोरङले जनाएको छ ।
