एजेन्सी : उत्तर कोरियाले रासायनिक अस्त्र निर्माणमा प्रयोग हुन सक्ने सामान सिरियालाई पठाइरहेको अमेरिकी सञ्चारमाध्यमले जनाएका छन् ।
संयुक्त राष्ट्रसंघका विज्ञले निकालेका नतिजालाई उदृत गर्दै सञ्चारमाध्यमले उत्तर कोरियाले अम्ल–प्रतिरोधी टायल, भल्स र पाइपहरू पठाएको बताएका हुन् । रासायनिक अस्त्रहरू बनाउने कारखानाहरूको निर्माणका लागि त्यस्ता टायलको प्रयोग गरिन्छ ।
न्यूयोर्क टाइम्सका अनुसार राष्ट्रसंघको सार्वजनिक भइनसकेको प्रतिवेदनमा प्योङयाङका क्षेप्यास्त्र विशेषज्ञहरू सिरियाली अस्त्र निर्माण कारखानाहरूमा देखिएको उल्लेख गरिएको छ । सिरियाली फौजले क्लोरिन ग्यास प्रयोग गरिरहेको भन्ने नयाँ रिपोर्ट आएपछि अमेरिकी सञ्चारमाध्यले पछिल्लो खबर सार्वजनिक गरेका हुन् ।
सिरियाली सरकारले भने क्लोरिन ग्याँस प्रयोग गरिएको कुरा अस्वीकार गर्दै आएको छ । पारमाणविक कार्यक्रमलाई लिएर उत्तर कोरियाले हाल अन्तर्राष्ट्रिय प्रतिबन्ध झेल्दै आएको छ ।
एउटा चिनियाँ कम्पनीमार्फत सन् २०१६ को अन्त्य र २०१७ को शुरूतिर पाँच खेप ती सामग्रीहरू सिरिया पु¥याइएको द वाल स्ट्रीट जर्नलले उल्लेख गरेको छ । केही वर्षयता सिरिया पठाइने गरिएका खेपहरूकै त्यो हिस्सा भएको बताइएको छ ।
सिरियाको सरकारी निकाय ‘द साइन्टिफिक स्टडिज एण्ड रिसर्च सेन्टर’ले कैयौँ कम्पनीमार्फत उत्तर कोरियालाई भुक्तानी गरेको समाचारमा उल्लेख गरिएको छ । सिरिया र उत्तर कोरियाबीच दशकौंदेखि सैन्य सम्बन्ध रहिआएको छ ।
