काठमाडौं, १४ फागुन। प्रधानमन्त्री केपी शर्मा ओलीले चार मन्त्री थप्दै सोमबार मन्त्रिपरिषद् विस्तार गरेका छन् ।
सोमबारबाट माओवादी केन्द्र पनि सरकारमा सहभगी भएको छ । तर, सरकारले पूर्णता पाउन भने अझै केही समय लाग्ने देखिएको छ ।
सोमबार माओवादी नेता रामबहादुर थापा बादल र मातृका यादव तथा एमालेका ईश्वर पोखरेल र युवराज खतिवडा मन्त्री बनेका हुन् । उनीहरुले सोमबार नै पद तथा गोपनियताको सपथसमेत लिएका छन् ।
माओवादी नेता थापा गृहमन्त्री बनेका छन् । पूर्वरक्षामन्त्री समेत रहेका उनी माओवादीका वरिष्ठ नेता हुन् । उनी माओवादीबाट सरकारमा पार्टीको नेतृत्व गर्दै सहभागि भएका हुन् ।
माओवादीमा गृहमन्त्रीका लागि बादलसँगै वर्षमान पुन र जनार्दन शर्मा प्रभाकरले दावेदार थिए । माओवादी नेतृत्वले भने बादललाई उपप्रधानसहित एउटा मन्त्रालय दिएर गृहमा अरु पठाउने तयारी गरेको थियो । तर, प्रधानमन्त्री ओलीले उपप्रधानमन्त्री नराख्ने प्रस्ताव अघि सारेपछि बादलले गृह छाडेनन् ।
माओवादीबाट मात्रिका यादव उद्योग, वाणिज्य तथा आपूर्ती मन्त्री बनेका छन् । यादव यसअघि बन मन्त्रालयको जिम्मेवारी लिइसकेका छन् ।
एमालेबाट महासचिव ईश्वर पोखरेल रक्षामन्त्री बनेका छन् । उपप्रधान तथा अर्थ मन्त्रालयको दावेदार रहेका पोखरेल रक्षामन्त्री बनेका हुन् ।
नेपाल राष्ट्रबैंकका गर्भनर युवराज खतिवडा भने अर्थमन्त्री बनेका छन् । पूर्वगर्भनर तथा योजना आयोगका उपाध्यक्ष समेत रहेका खतिवडालाई राष्ट्रियसभा सदस्यमा सरकारले मनोनित गरेको भएपनि सर्बोच्च अदालतले सपथमा रोक लगाएको छ ।
संविधानले संसद सदस्य नरहेपनि ६ महिनासम्म मन्त्री बन्न पाउने बाटो खुल्ला राखेकोले खतिवडा मन्त्री नियुक्त भएका हुन् । सोमबारको विस्तारसँगै ओली सरकार सात सदस्यीय बनेको छ । लालबाबु पण्डित र थममाया थापा प्रधानमन्त्रीको सपथकै दिन मन्त्री नियुक्त भएका थिए ।
