मोरङ, कानेपोखरी – कानेपोखरी गाउँपालिका वडा नम्बर २ निवासी जगदिश मुसहरको खुट्टामा रहेको पुरानो घाउ गम्भीर रूपमा विग्रिएपछि अपरेशन गर्नुपर्ने अवस्था आएको छ । तर, आर्थिक अभाव र सरकारी स्वास्थ्य बीमा योजनाको पहुँच नहुँदा आवश्यक उपचार रोकिएको छ ।
स्थानीय अविनाश मण्डलका अनुसार, घाउ लामो समयदेखि बिग्रिँदै आएको थियो र अहिलेको अवस्थामा संक्रमण गहिरिँदै गएकाले चिकित्सकले तत्काल सर्जिकल उपचार आवश्यक रहेको बताएका छन् । हाल बिरामी विराटनगरस्थित कोशी अस्पतालमा भर्ना भएका छन् ।
पारिवारिक स्रोतका अनुसार, मुसहर समुदायको जीवनस्तर निकै न्यून रहेकोले जगदिश मुसहरले स्वास्थ्य बीमा योजना लिन पाएका थिएनन् । आर्थिक स्थिति कमजोर हुँदा नियमित उपचार गराउन नसकिएको र अवस्था बिग्रँदै गएपछि मात्रै अस्पताल जानुपरेको उल्लेख गरिएको छ ।
स्थानीय प्रतिनिधि तथा सामाजिक व्यक्तित्वहरूको पहलमा कोशी अस्पताल प्रशासनसँग समन्वय गरी प्रारम्भिक अपरेशनको व्यवस्था मिलाइएको छ । तर, बिरामीको पूर्ण उपचारका लागि अझै थप आर्थिक सहयोगको आवश्यकता रहेको छ ।
जगदिश मुसहरका परिवारका सदस्यहरू र स्थानीय समाजसेवीहरूले सम्पूर्ण गाउँपालिकावासी, संघसंस्था, सामाजिक अभियन्ता, गैरसरकारी संस्था र सहयोगी मनहरूलाई आवश्यक सहयोगका लागि आग्रह गरेका छन् ।
बिरामीको अहिलेको अवस्था गम्भीर भए पनि समयमै अपरेशन तथा औषधोपचार भएमा निको हुने सम्भावना चिकित्सकहरूले देखाएका छन् । त्यसैले, मानविय आधारमा सहयोग गर्न सक्ने सबैलाई अपिल गरिएको छ ।
Thanks, ???? garib bipanna pariwar lai upachar ko nimti sahyog ko batawran banai diyeko ma