करिब एक महिना अगाडि विराटनगरमा हिन्दु धर्मका गुरु श्रीनिवासाचार्यमाथि भएको गोलीकाण्डलाई फरक–फरक कोणबाट हेरिएको थियो । कतिपयले हिन्दु धर्ममाथि भएको प्रहारको रुपमा यसको व्याख्या गरेका थिए भने कतिपयले यो घटनालाई प्रायोजित भनेका थिए । गोली प्रहारपछि हिन्दु धर्ममाथि आस्था राख्नेहरुले जुलुस प्रदर्शनसमेत गरेका थिए ।
श्रीनिवासाचार्यले पनि गोली प्रहारपछि सरकार र ठूला राजनीतिक दलहरुलाई गाली गर्दै आएका थिए । तर, सो घटना उनकै योजनामा भएको प्रायोजित भएको खुलासा भएको छ । धार्मिक द्वन्द्व चर्काउने उद्देश्यले आफ्नै सहयोगीलाई बन्दुक चलाउने तालिमसमेत दिएर श्रीनिवासाचार्यले आफैमाथि गोली प्रहार गर्न लगाएको प्रहरीले सार्वजनिक गरेको छ । सो घटना धर्मको आडमा भइरहेको अपराधिक हर्कत सार्वजनिक भएको छ ।
पूर्वराजा ज्ञानेन्द्रका निकट मानिएका श्रीनिवासाचार्यले यसअघि पनि विवादास्पद गतिबिधि गर्दै आएका थिए । संविधानसभाबाट संविधान निर्माण हुने चरणमा नेपाललाई हिन्दु राज्य नबनाएर देशभरीका चर्चमा बम पड्काउने धम्की दिएर उनी विवादमा आएका थिए । त्यसपछि कतिपय चर्चहरुमा बम आक्रमणको घटनासमेत भएको थियो । तर, राज्यले उनीमाथि अनुसन्धान गर्न सकेन ।
पछिल्लो पटक पूर्वराजा ज्ञानेन्द्रसँगको बाक्लो उठबसपछि उनी नेपाललाई हिन्दु राष्ट्र बनाएरै छाड्ने बताउँदै आएका थिए । तर, उनको अभियान प्रभाबकारी नभएपछि आफैंमाथि गोली प्रहार गराएका थिए । हिन्दु विरोधीले आपूmमाथि गोली प्रहार गरेको हल्ला गरेर धार्मिक द्वन्द्व चर्काउने उनको नियत रहेको स्पष्टै छ । तर, सचेत नागरिकहरुको कारण उनी र उनका पिछलग्गुहरुको योजना अनुसार द्वन्द्वको अवस्था बनेन । बरु, उनी नै प्रहरीको फन्दामा परेका छन् ।
नेपालको संविधानले धार्मिक स्वतन्त्रता प्रदान गरेको छ । हरेक नागरिकलाई आफूले चाहेको धर्म मान्न पाउने स्वतन्त्रता संविधानले दिएको छ । तर, जबरजस्त अमुक धर्म र त्यसका संस्कार लाद्ने असंवैधानिक प्रयास भइरहेको छ । त्यस्ता प्रयासमा कतिपय सन्दर्भमा राज्य नै सहयोगी बनिरहेको छ । अतिवादी हिन्दु पण्डितहरुको अराजकतालाई छुटदेखि गाई काटेको प्रकरणमा नागरिकहरु पक्राउ परेका घटनाहरु त्यसकै नमुना हुन् । यसबाट राज्य पनि गम्भीर बन्न जरुरी छ । षड्यन्त्रकारी घटनाको नाइके श्रीनिवासाचार्यमाथि कडाभन्दा कडा कार्वाही हुनुपर्छ । धार्मिक द्वन्द्व चर्काएर आफ्नो स्वार्थको रोटी सेक्न खोज्नेहरुको पहिचान गरी कानुनी दायरामा ल्यानुपर्छ । नेपाली जनताको ठूलो संघर्षपछि प्राप्त परिवर्तन संस्थागत गर्न सबै नेपाली जनता पनि सचेत हुनुपर्छ ।
