विराटनगर । राजस्वमा इ–पेमेन्ट (विद्युतीय भुक्तानी) बुधबारदेखि सुरु भएको छ । वैशाख १ गते सुरु गर्ने तयारी गरिए पनि आवश्यक कार्यविधि पास नहुँदा १२ दिन ढिला गरी राजस्व विद्युतीय भुक्तानी सुरु गर्न लागिएको हो ।
बुधबार बिहान साढे १० बजे अर्थमन्त्रालयमा ई–पेमेन्टको लागि मिलाएको ‘सर्भर’ अर्थमन्त्री डा. युवराज खतिवडाले सुरु गर्नुभएको हो ।
महालेखा नियन्त्रणको कार्यालयले करदाता सेवा कार्यालय ठमेलबाट विद्युतीय भुक्तानी सुरु गर्ने भएको छ ।
बुधबारबाट ठमेल करदाता सेवा कार्यालयमा कर तिर्ने करदाताले विद्युतीय भुक्तानी गर्न पाउने छन् । साउनसम्ममा सबै करदाता कार्यालयमा विद्युतीय भुक्तानी गर्ने तयारी महालेखा नियन्त्रण कार्यालयको छ । खतिवडा अर्थमन्त्री बनेपछि पहिलो निर्णयको रूपमा सरकारको आम्दानी र खर्चमा विद्युतीय प्रणाली ई–पेमेन्ट लागू गर्ने निर्णय गर्नुभएको थियो ।
पहिलो चरणमा निश्चित कार्यलयका करदातालाई ई–पेमेन्ट गराउने र साउनदेखि सबैलाई ई–पेमेन्ट लगाउने गरी तयारी गरिएका महालेखाका अधिकारीले बताउनु भयो ।
नेपाल किलियरिङ हाउस लिमिटेड (एनसीएचएल) सँगको समन्वयमा महालेखा नियन्त्रणको कार्यालयले राजस्वमा ई–पेमेन्ट सुरु गर्न थालेको हो । अहिलेसम्म नेपाल ७४ वटा वित्तीय संस्थाले अन्तरबैंक विद्युतीय भुक्तानी प्रणाली (आईपीएस) सेवा सञ्चालन गरेकोमा साउनदेखि यी सबै बैंहरूबाट यो राजस्व तिर्ने मिल्ने व्यवस्था गर्न सकिने बताइएको छ । अहिले भने ६ वटा बैंकमार्फत यो व्यवस्था मिलाइएको छ ।
करदातालाई सहज ई–पेमेन्ट लागू भएपछि पारदर्शिता र करदातालाई सहज हुनेछ । अहिले करदाताले कार्यालय खुलेको समयमा लाइनमा बसेर भौचर भरेर मात्रै कर बुझाउन पाएका छन् । अब भने यी करदाताले घरमै बसेर आफ्नो कर तिर्न सक्नेछन् ।
