मोरङ। एकीकृत अखिल नेपाल शिक्षक संगठनको पथरीशनिश्चरे नगर सम्मेलनबाट नरेन्द्र घिसिङ अध्यक्षमा निर्वाचित भएका छन्। शिक्षक आन्दोलन, शैक्षिक सुधार र पेशागत हकहितका सवालमा सक्रिय भूमिका खेल्दै आएको संगठनले नयाँ नेतृत्व चयनसँगै नगरस्तरमा पुनः सक्रियता बढाउने संकेत दिएको छ।
सम्मेलनबाट उपाध्यक्षमा आनन्दप्रसाद घिमिरे, सन्तबहादुर राई र रामकुमारी राई सर्वसम्मत चयन भएका छन्। सचिवमा भूपाल ठटाल, सहसचिवमा शम्भू बराइली र कोषाध्यक्षमा नारायण प्रसाद तिम्सिना निर्वाचित भएका छन्। सदस्यहरूमा भक्ती रेग्मी, पद्मा पाण्डे र तिलक जोगी चयन भएका छन्।
कार्यक्रम निवर्तमान अध्यक्ष तुलसी प्रसाद भट्टराईको अध्यक्षतामा सम्पन्न भएको थियो। सचिव भूपाल ठटालले सञ्चालन गरेको कार्यक्रममा उपाध्यक्ष रामकुमारी राईले स्वागत मन्तव्य व्यक्त गरेकी थिइन्। कार्यक्रममा अध्यक्ष भट्टराईले आफ्नो कार्यकालको प्रगति प्रतिवेदन प्रस्तुत गर्दै संगठनले विगतमा नगरभित्र शिक्षक एकता, शैक्षिक नीतिगत बहस र विभिन्न आन्दोलनमा खेलेको भूमिकाको समीक्षा गरेका थिए।
संगठनको नगरस्तरीय इतिहास
पथरीशनिश्चरे क्षेत्रमा शिक्षकहरूलाई एउटै छातामुनि संगठित गर्ने उद्देश्यसहित एकीकृत अखिल नेपाल शिक्षक संगठनको नगर समिति गठन भएको करिब डेढ दशकभन्दा बढी समय भइसकेको छ। प्रारम्भिक चरणमा सीमित सदस्य र साधनस्रोतका बाबजुद संगठनले सामुदायिक विद्यालयका शिक्षकहरूको सरुवा–बढुवा, दरबन्दी मिलान, तलब–भत्ता, अस्थायी शिक्षक व्यवस्थापन र शिक्षा ऐन संशोधनजस्ता विषयमा सक्रिय भूमिका निर्वाह गर्दै आएको थियो।
स्थानीय तह पुनर्संरचनापछि शिक्षा व्यवस्थापनको जिम्मेवारी नगरपालिकामा आएपछि संगठनले नगर शिक्षा शाखासँग समन्वय गरी शिक्षक अधिकार र दायित्वका विषयमा निरन्तर छलफल र दबाबमूलक कार्यक्रम सञ्चालन गरेको थियो। विभिन्न समयमा शिक्षकहरूको पेशागत सुरक्षाका सवालमा ज्ञापनपत्र बुझाउने, अन्तरक्रिया आयोजना गर्ने र आवश्यक पर्दा आन्दोलनमा सहभागी हुने कामसमेत संगठनले गर्दै आएको इतिहास छ।
निवर्तमान अध्यक्ष तुलसी प्रसाद भट्टराईको कार्यकालमा संगठनले सदस्यता विस्तार, प्रशिक्षण कार्यक्रम र पेशागत विकाससम्बन्धी गोष्ठी आयोजना गरेको थियो। तर भट्टराई सेवा निवृत्त भएपछि केही समय संगठनमा सुस्तता देखिएको स्वीकार गर्दै नेतृत्वले अब पुनः संगठनलाई चलायमान बनाउने प्रतिबद्धता जनाएको छ।
नेताहरूको धारणा
नगर भेलामा संगठनका केन्द्रीय सचिवालय सदस्य भूमिकादेवी मगरले शिक्षक एकताको आवश्यकता औंल्याउँदै नगरस्तरबाटै सशक्त आवाज उठाउनुपर्ने बताइन्। उनले संघीय संरचनाअनुसार संगठनलाई तल्लो तहसम्म मजबुत बनाउनुपर्नेमा जोड दिइन्।
प्रदेश सदस्य देउमान लिम्बूले शिक्षकका पेशागत अधिकारसँगै गुणस्तरीय शिक्षाका लागि संगठनले रचनात्मक भूमिका खेल्नुपर्ने धारणा राखे। जिल्ला सहअध्यक्ष घनश्याम ढकालले संगठनलाई राजनीतिक परिवर्तनसँगै पेशागत मुद्दामा केन्द्रित राख्न आग्रह गरे।
पार्टी जिल्ला सदस्य कमल हाङबाङले शिक्षक संगठन र पार्टीबीच समन्वय आवश्यक भए पनि विद्यालयको शैक्षिक वातावरण सुदृढ बनाउन प्राथमिकता दिनुपर्ने बताए। नगर उपाध्यक्ष सुमन वनेमले नगरभित्रका सबै विद्यालयका शिक्षकलाई संगठनमा आबद्ध गराई साझा मुद्दामा एकताबद्ध गरिने प्रतिबद्धता व्यक्त गरे।
एकतापछि पुनर्गठनको प्रक्रिया
पार्टी नेकपा (एस) लगायतसँग एकता भए पनि भातृ संगठनहरू प्रदेश, जिल्ला हुँदै नगरसम्म पूर्णरूपमा पुनर्गठन हुन समय लाग्ने भएकाले संगठनलाई सक्रिय राख्न नगर भेला आयोजना गरिएको जनाइएको छ। नयाँ नेतृत्व चयनसँगै संगठनले आगामी दिनमा सदस्यता अद्यावधिक, प्रशिक्षण, शैक्षिक नीति बहस तथा शिक्षक हितका कार्यक्रमलाई प्राथमिकता दिने जनाएको छ।
नव–निर्वाचित अध्यक्ष नरेन्द्र घिसिङले संगठनलाई पुनः सशक्त र प्रभावकारी बनाउने प्रतिबद्धता व्यक्त गर्दै शिक्षकको पेशागत हकहित, सम्मान र गुणस्तरीय शिक्षाका लागि निरन्तर क्रियाशील रहने बताएका छन्।
