पथरी शनिश्चरे । पथरी शनिश्चरे नगरपालिकाले क्षयरोग (टीबी) उन्मूलन अभियानलाई तीव्रता दिँदै वडा नं. ३ मा एआई (कृत्रिम बुद्धिमत्ता) जडित एक्स–रे प्रविधिमार्फत स्क्रीनिङ क्याम्प सञ्चालन गरेको छ । सोमबार वडा नं. ३ स्थित सामाजिक आधारभूत विद्यालयमा आयोजित क्याम्पमा १ सय ५० जनाको छातीको एक्स–रे परीक्षण गरिएकोमा २९ जना शंकास्पद क्षयरोगी पहिचान भएको स्वास्थ्य शाखाले जनाएको छ ।
स्वास्थ्य शाखाका सिअहेव एकराज खत्रीका अनुसार पहिचान भएका शंकास्पद बिरामीहरूको थप परीक्षण (स्पुटम जाँच) गरी आवश्यक उपचार प्रक्रिया अघि बढाइनेछ । “समुदायमै पुगेर प्रारम्भिक चरणमै रोग पहिचान गर्ने उद्देश्यले क्याम्प सञ्चालन गरिएको हो,” उहाँले भन्नुभयो ।
स्वास्थ्य शाखा प्रमुख मुरारी आचार्यका अनुसार आज वडा नं. ६ को रामजानकी आधारभूत विद्यालयमा क्याम्प सञ्चालन गरिँदैछ । यसैगरी माघ ६ गते वडा नं. ९ को वडा कार्यालय, ७ गते वडा नं. १० को आधारभूत स्वास्थ्य केन्द्र शिविर डाँडा र ८ गते वडा नं. १ को आधारभूत स्वास्थ्य केन्द्रमा स्क्रीनिङ क्याम्प सञ्चालन हुने तालिका तय गरिएको छ ।
नगरपालिकाले विगतका वर्षहरूदेखि नै क्षयरोग नियन्त्रणका लागि विभिन्न कार्यक्रम सञ्चालन गर्दै आएको छ । अघिल्ला आर्थिक वर्षहरूमा घरदैलो खोजपडताल, निःशुल्क औषधि वितरण, पोषण सहयोग कार्यक्रम तथा सचेतनामूलक अन्तरक्रिया कार्यक्रम सञ्चालन गरिएको थियो । विशेषगरी कोभिड–१९ महामारीपछिको अवधिमा लुकेर बसेका सम्भावित बिरामी पहिचान गर्न समुदाय–आधारित खोजपडताल कार्यक्रमलाई प्राथमिकतामा राखिएको थियो ।
गत वर्ष नगरपालिकाले १ सयभन्दा बढी शंकास्पद बिरामीको नमुना परीक्षण गरी पुष्टि भएका बिरामीलाई प्रत्यक्ष निगरानीमा औषधि सेवन (डट्स) कार्यक्रममार्फत उपचारमा समावेश गरेको जनाएको छ । उपचार अवधिभर बिरामीलाई नियमित परामर्श, अनुगमन तथा आवश्यक परे पोषण सहयोगसमेत उपलब्ध गराइएको थियो ।
नेपाल सरकारको राष्ट्रिय क्षयरोग नियन्त्रण कार्यक्रमअन्तर्गत देशभर निःशुल्क परीक्षण र उपचारको व्यवस्था छ । स्वास्थ्य तथा जनसंख्या मन्त्रालय अन्तर्गत सञ्चालित राष्ट्रिय कार्यक्रमले सन् २०३५ सम्ममा क्षयरोग उन्मूलन गर्ने लक्ष्य लिएको छ । सोही लक्ष्यअनुसार स्थानीय तहहरूसँग सहकार्य गर्दै सक्रिय खोजपडताल, डिजिटल एक्स–रे तथा जीनएक्सपर्ट प्रविधिमार्फत छिटो परीक्षण विस्तार गरिएको छ ।
नगरपालिकाका जनप्रतिनिधिहरूले समुदायस्तरमै पुगेर रोग पहिचान र उपचार सुनिश्चित गर्न यस्ता क्याम्प प्रभावकारी बनेको बताएका छन् । प्रारम्भिक चरणमै क्षयरोग पहिचान गरी उपचारमा ल्याउन सके संक्रमणको श्रृंखला तोड्न सकिने विश्वास गरिएको छ ।
स्वास्थ्य शाखाले सबै नागरिकलाई लगातार दुई हप्ताभन्दा बढी खोकी लागेमा, ज्वरो आउने, तौल घट्ने वा राति पसिना आउने जस्ता लक्षण देखिएमा नजिकको स्वास्थ्य संस्थामा परीक्षण गराउन आग्रह गरेको छ ।
