इटहरी । एक नम्बर प्रदेश सरकारका आर्थिक मामिला तथा योजनामन्त्री ईन्द्रबहादुर आङ्बोले आफ्नो पहिलो तलब शहीद भूमिलाई अर्पण गर्ने घोषणा गर्नुभएको छ ।
शहीद सप्ताहको अन्तिम दिन सुनसरीको इटहरी १९ हाँसपोसा स्थित शहीद स्मृति उच्च माविमा आयोजित कार्यक्रममा प्रदेश मन्त्री आङ्बोले आफ्नो तलब पाँचथरको आमबोटे शहीद भूमिलाई अर्पण गर्ने घोषणा गर्नुभएको छ ।
मन्त्री आङ्बोका अनुसार शसस्त्र जनयुद्धको समयमा २०६२ भदौ १० गते पाँचथरको फाल्गुनन्द गाउँपालिका ६ आङ्साराङको आमबोटेमा एकै पटक ८ जनाले शहादत प्राप्त गरेका थिए । हाल त्यहाँ शहीद प्रतिष्ठान स्थापना गरेपनि आर्थिक अभावमा ठोस योजना आगाडि बढ्न सकेको छैन । प्रदेशबासी मन्त्री आङ्बो त्यहीबाट प्रदेशसभामा बिजयी भएका थिए ।
एक नम्बर प्रदेश सरकारले प्रदेशभरीका शहीद भूमिलाई नमुना बस्तीको रुपमा विकास गर्ने पहिलो निर्णय गरेको जानकारी दिँदै मन्त्री आङ्बोले आगामी बजेटबाटै त्यो कार्यान्वयनमा जाने बताउनुभयो । शहीद प्रतिष्ठान नेपालले सञ्चालन गरेको विद्यालयलाई पनि आवश्यक सहयोग गर्ने प्रतिबद्धता उहाँले जनाउनुभएको छ ।
परिवर्तनका लागि रगत बगाउने सबै आन्दोलनका शहीदहरुलाई एक नम्बर प्रदेश सरकारले सम्मान गर्ने मन्त्री आङ्बोले जानकारी दिनुभएको छ । फागुन १४ देखि फागुनसम्म मनाइएको शहिद सप्ताहमा शहीद विद्यालयले बिभिन्न शैक्षिक कार्यक्रम आयोजना गरेको थियो । सप्ताह समापनमा जेहेन्दार तथा खेलकुदमा बिजयी हुने विद्यार्थीहरुलाई पुरस्कार वितरण गरेका थिए ।
कक्षा १२ सम्म सञ्चालन भइरहेको विद्यालयमा हाल ४ सय ५० विद्यार्थी अध्यनरत छन् । विद्यालयमा हाल सशस्त्र जनयुद्धका शहीद, घाइते, अपाङ्ग र बेपत्ता परिवारसँगै मधेश आन्दोलनका शहीद र भुकम्पपीडित परिवारका सन्तानहरु अध्ययन गरिरहेका छन् । विद्यालयमा १५ प्रतिशत स्थानीय विद्यार्थी पनि पढ्ने गर्दछन् ।